శాసన పరిశోధనలో సాధు సుబ్రహ్మణ్యశాస్త్రి కృషి చిరస్మరణీయం – ప్రముఖ శాసన పరిశోధకులు శ్రీ సొరకాయల కృష్ణారెడ్డి SADU SUBRAMANYA SASTRY

తిరుమల శాసనాలు, అన్నమయ్య సంకీర్తనలను వెలికితీసి, అనువదించి శ్రీవేంకటేశ్వరస్వామివారి వైభవాన్ని ప్రపంచానికి చాటిన మహనీయుడు సాధు సుబ్రహ్మణ్యశాస్త్రి అని ప్రముఖ శాసన పరిశోధకులు శ్రీ సొరకాయల కృష్ణారెడ్డి అన్నారు.

తిరుపతి అన్నమాచార్య కళామందిరంలో గురువారం జరిగిన సాధు సుబ్రహ్మణ్యశాస్త్రి 45వ వర్ధంతి సభలో ఆయన “సాధు సుబ్రహ్మణ్యశాస్త్రి పరిశోధనా దీక్ష” అనే అంశంపై ప్రసంగించారు. శ్రీవారి ఆలయ పేష్కారుగా పనిచేస్తూ 1,167 రాగిరేకుల శాసనాలను సేకరించి, అనువదించారని తెలిపారు. అన్నమయ్య సంకీర్తనలకు సంబంధించిన అనేక రాగిరేకులను వెలికితీసి, వాటిని సమాజానికి అందించడంలో శాస్త్రి కీలక పాత్ర పోషించారని పేర్కొన్నారు.

ఎస్వీ విశ్వవిద్యాలయం తెలుగు విభాగం విశ్రాంత ఆచార్యులు శ్రీ శ్రీనివాసులు రెడ్డి “సాధు సుబ్రహ్మణ్యశాస్త్రి పరిశోధనా పటిమ” అనే అంశంపై ప్రసంగించారు. ప్రాచీన గ్రంథాలను లోతుగా అధ్యయనం చేసి తెలుగు సాహిత్య పరిశోధనకు విశేష సేవలందించారని, ఆయన పరిశోధనా దృక్పథం నేటి పరిశోధకులకు స్ఫూర్తిదాయకమని తెలిపారు.

పుష్పాంజలి

సాధు సుబ్రహ్మణ్యశాస్త్రి 45వ వర్ధంతి సందర్భంగా శ్వేత భవనం ఎదురుగా ఉన్న ఆయన విగ్రహానికి టీటీడీ అధికారులు పుష్పాంజలి ఘటించారు.

అనంతరం శ్రీ గౌరిపెద్ది రామసుబ్బశర్మ 104వ జయంతి సందర్భంగా ఎస్వీ ఓరియంటల్ కళాశాలలోని ఆయన విగ్రహానికి పుష్పాంజలి ఘటించారు.

 సాయంత్రం అన్నమాచార్య కళామందిరంలో జయంతి సభ నిర్వహించారు.

ఈ కార్యక్రమాల్లో సాధు సుబ్రహ్మణ్యశాస్త్రి కుమార్తె శ్రీమతి గిరిజాదేవి, మనుమడు హైకోర్టు రిజిస్ట్రార్ శ్రీ మూర్తి, శ్వేత ఇన్‌చార్జి సంచాలకులు డా. వేమా. వేంకటరత్నం, అన్నమాచార్య ప్రాజెక్టు సంచాలకులు డా. లత, ప్రముఖ సాహితీవేత్త శ్రీ గౌరిపెద్ది వెంకట శంకర భగవాన్, ఇతర అధికారులు, సాహితీవేత్తలు, పుర ప్రముఖులు పాల్గొన్నారు.