క‌ల్ప‌వృక్ష వాహనసేవలో ఆధ్యాత్మిక పుస్తకాల ఆవిష్కరణ kalpa vruksha vahana

శ్రీవారి సాల‌క‌ట్ల‌ బ్రహ్మోత్సవాల్లో నాలుగో రోజైన శ‌నివారం ఉదయం క‌ల్ప‌వృక్ష‌ వాహనసేవలో మూడు ఆధ్యాత్మిక పుస్తకాలను టిటిడి ఛైర్మ‌న్ శ్రీ బీఆర్ నాయుడు ఆవిష్కరించారు.

" వైదిక విజ్ఞానం "

-   డాక్టర్ చిర్రావూరి శివరామకృష్ణశర్మ

భారతీయ సంస్కృతికి, తత్త్వజ్ఞానానికి మూలమే వేదాలు. సమాజంలోని ప్రతి వ్యక్తి మన ప్రాచీన భారతీయుల విజ్ఞాన వైభవాన్ని, విశాల దృక్పథాన్ని అర్థం చేసుకున్నప్పుడే అర్షవాఙ్మయానికి ఆదరణ లభిస్తుంది.

శ్రీమద్భాగవత వైశిష్ట్యం, కల్పసూత్రాలు, బ్రహ్మచర్య ప్రాశస్త్యం, వాయూత్పత్తి ప్రాణం, జీవితలక్ష్యాలు, ధన్యోపాఖ్యాన గాంభీర్యం, ప్రాచీన భారతీయ యంత్రవిజ్ఞానం, వైమానిక శాస్త్ర పరిచయం, మహావీరుడు మహావీరం, హరప్పా అవశేషాలలో శివావతారాలు, ఆరాధన- అనుభూతి, మృత్యువు, దయానంద సరస్వతి - ఆయన వ్యాఖ్యాన పద్ధతి- అనే శీర్షికలు వైదిక విజ్ఞానం అనే ఈ గ్రంథంలో తెలియజేశారు.

" జానపదుల ఆధ్యాత్మికత "

• డాక్టర్ పులికొండ సుబ్బాచారి
• జానపద సాహిత్యమంటే పల్లె ప్రాంతాలలో గ్రామీణుల మధ్య ప్రచారమైన సాహిత్యం. మనం నిత్యజీవితంలో పల్లెటూరి జనాన్ని, గ్రామీణుల్ని జానపదులంటాం. కానీ ఒక విశ్వాసం కలిగిన వారందరూ జానపదులే. వీరికి సంబంధించిన సాహిత్యమే జానపద సాహిత్యమవుతుంది. జానపద సంప్రదాయంలో సరికొత్త దీక్షలు సామాన్య ప్రజలను ఆధ్యాత్మికతారంగంలో ప్రవేశింపజేశాయి.

ఈ జానపద వాఙ్మయంలో నాగరీకులు కూడా ఆశ్చర్యపడే కళాతీరులున్నాయి. వీటన్నిటికి సంబంధించిన పరిజ్ఞానాన్నిటీటీడీ సామాన్య ప్రజలకు ఈ గ్రంథం ద్వారా అందించింది.

"ఆనంద నిలయం"(ఇంగ్లీషు అనువాదం)

-   ఆచార్య భోగరాజు పార్వతి

కలియుగ ప్రత్యక్షదైవమైన శ్రీ వేంకటేశ్వర స్వామివారు వేంకటాద్రిని చేరిన విధానం, వరాహక్షేత్రంపై నివాసం ఏర్పరచుకొని ఆనందనిలయ దివ్య విమానాన్ని వైకుంఠం నుండి తెప్పించుకోవడం, పద్మావతీ శ్రీనివాసుల కల్యాణంతోపాటు స్వామి పుష్కరిణీ మాహాత్మ్యం, తిరుమల క్షేత్రంలోని దివ్యతీర్థాలు, తొండమానుని ఇతివృత్తం మొదలైన అనేక విషయాలను అర్థమయ్యేలా చక్కటి ఆంగ్ల భాషలోకి అనువదించారు.