బ్ర‌హ్మోత్స‌వాల్లో పారిశుద్ధ్యానికి పెద్ద‌పీట‌: టీటీడీ ఆరోగ్య విభాగం డిప్యూటీ ఈవో శ్రీ సోమ‌న్నారాయ‌ణ‌-sanitation

శ్రీ‌వారి వార్షిక బ్ర‌హ్మోత్స‌వాల్లో పారిశుద్ధ్యానికి పెద్ద‌పీట వేసిన‌ట్లు టీటీడీ ఆరోగ్య విభాగం డిప్యూటీ ఈవో శ్రీ సోమ‌న్నారాయ‌ణ తెలిపారు. తిరుమ‌ల‌లోని రామ్ భ‌గీచా - 2లో ఏర్పాటు చేసిన మీడియా సెంట‌ర్ లో ఆయ‌న మంగ‌ళ‌వారం ఆరోగ్య విభాగంపై మీడియా స‌మావేశం నిర్వ‌హించారు.

తిరుమ‌ల‌లో పారిశుద్ధ్యం లోపించ‌కుండా ముంద‌స్తు ప్ర‌ణాళిక‌లు రూపొందించుకుని అమ‌లు చేసిన‌ట్లు చెప్పారు. ఎప్ప‌టిక‌ప్పుడు మ‌రుగుదొడ్ల‌ను శుభ్రం చేసేందుకు స్టాండ‌ర్డ్ ఆప‌రేటింగ్ ప్రొసీజ‌ర్ ను రూపొందించుకుని విజ‌య‌వంతంగా అమ‌లు చేశామ‌ని తెలిపారు. బ్ర‌హ్మోత్స‌వాల కోసం పారిశుద్ధ్య సిబ్బందికి రెండు నెల‌లుగా ముంద‌స్తు శిక్ష‌ణ ఇచ్చిన‌ట్లు పేర్కొన్నారు.

బ్ర‌హ్మోత్స‌వాల కోసం ఏర్పాటు చేసిన తాత్కాలిక మ‌రుగుదొడ్లను ఎప్ప‌టిక‌ప్పుడు శుభ్రం చేసి దుర్వాస‌న రాకుండా చ‌ర్య‌లు చేప‌ట్టామ‌ని తెలిపారు. ఇంజినీరింగ్ అధికారుల స‌హ‌కారంతో తిరుమ‌ల‌లో మ‌రుగుదొడ్ల నిర్వ‌హ‌ణ వ్య‌వ‌స్థ‌ను మ‌రింత ప‌టిష్టం చేశామ‌ని చెప్పారు.

గ‌రుడ‌వాహ‌నం రోజున 650 మంది అద‌న‌పు సిబ్బందితో మాడ వీధుల్లో పారిశుద్ధ్యం ప‌నులు నిర్వ‌హించామ‌ని తెలిపారు. గ్యాల‌రీల్లోని భ‌క్తుల‌కు పంపిణీ చేసిన ప్లాస్టిక్ వాట‌ర్ బాటిళ్ల‌ను ఎప్ప‌టిక‌ప్పుడు సేక‌రించేందుకు ప్ర‌త్యేక చ‌ర్య‌లు తీసుకున్నామ‌న్నారు. సిబ్బంది అంకిత‌భావంతో ప‌ని చేయ‌డంతో ఎలాంటి ఇబ్బందులు త‌లెత్త‌కుండా పారిశుద్ధ్యం ప‌నుల చేప‌ట్టామ‌ని చెప్పారు.

వేలాది ఫుడ్‌, వాట‌ర్ శాంపిల్స్ సేక‌రించి నాణ్య‌త ప‌రీక్ష‌లు నిర్వ‌హించామ‌ని తెలిపారు. తిరుమ‌ల‌లో ఈగ‌ల‌ను నియంత్రించేందుకు చ‌ర్య‌లు చేప‌ట్టామ‌ని అన్నారు. డంపింగ్ యార్డు నుండి వ‌చ్చే టిప్ప‌ర్ల‌ ద్వారా ఈగ‌లు తిరుమ‌ల‌కు వ‌స్తున్న‌ట్లు గుర్తించామ‌ని, ఈ స‌మ‌స్య‌కు ప‌రిష్కారంగా డంపింగ్ యార్డు వ‌ద్ద టిప్ప‌ర్ల‌ను శుభ్రం చేసి తిరుమ‌ల‌కు తీసుకొస్తున్న‌ట్ల చెప్పారు. అంతే కాకుండా ఈగ‌లు, దోమ‌లు, బొద్దింక‌ల నివార‌ణ‌కు వెక్ట‌ర్ సిస్టమ్ ను అందుబాటులోకి తీసుకొచ్చిన‌ట్లు తెలియ‌జేశారు.

ఈ కార్య‌క్ర‌మంలో టీటీడీ హెల్త్ ఆఫీస‌ర్ శ్రీ మ‌ధుసూద‌న్‌, ఇత‌ర అధికారులు పాల్గొన్నారు.