శ్రీవారి సేవ ‘ట్రెయిన్ ద ట్రైనీస్’ శిక్షణా కార్యక్రమం ప్రారంభం train the trainee

రాష్ట్ర ముఖ్య‌మంత్రి శ్రీ నారా చంద్ర‌బాబు నాయుడు ఆదేశాల మేర‌కు శ్రీ‌వారి సేవ‌ను మ‌రింత బ‌లోపేతం చేయ‌డంలో భాగంగా వారిలోని నైపుణ్యాలను అభివృద్ధి చేయడమే ‘ట్రెయిన్ ద ట్రైనీస్’ శిక్షణా  కార్యక్రమం వెనుక ఉన్న ప్రధాన ఉద్దేశమని టీటీడీ అదనపు ఈవో శ్రీ సి.హెచ్. వెంకయ్య చౌదరి అన్నారు.

మంగళవారం తిరుమలలోని సేవా సదన్–2లో గ్రూప్ సూపర్వైజర్ల (మాస్టర్ ట్రైనర్లు)లకు నిర్వహించిన తొలి బ్యాచ్ 'ట్రెయిన్ ద ట్రైనీస్' శిక్షణా కార్యక్ర‌మానికి ఆయన విచ్చేశారు. 

ఈ సంద‌ర్భంగా ఆయ‌న మాట్లాడుతూ శ్రీ‌వారి సేవ‌కులు హిందూ ధ‌ర్మానికి బ్రాండ్ అంబాసిడ‌ర్లు అని చెప్పారు. దేశ‌విదేశాల నుండి తిరుమ‌ల‌కు విచ్చేస్తున్న భ‌క్తుల‌కు సేవ చేయ‌డంలో  శ్రీ‌వారి సేవ‌కుల పాత్ర అత్యంత కీల‌క‌మైన‌ది తెలిపారు.

ఈ శిక్ష‌ణా కార్య‌క్ర‌మం ద్వారా త‌మ త‌మ ప్రాంతాల్లోని శ్రీ‌వారి సేవ‌కుల‌కు గ్రూప్ సూప‌ర్వైజ‌ర్లు శిక్ష‌ణ ఇచ్చేందుకు ఆంధ్ర ప్రదేశ్ ప్లానింగ్ డిపార్ట్మెంట్,  ఐఐఎం–అహ్మదాబాద్ నిపుణులు శిక్షణ మాడ్యూల్‌లను రూపొందించిన‌ట్లు చెప్పారు.

ఈ శిక్షణలో వ్యక్తిత్వ వికాసం, నైపుణ్యాల పెంపు, కమ్యూనికేషన్, భక్తులతో న‌డ‌వ‌డిక‌, నాయకత్వ లక్షణాలు, టీటీడీ చరిత్ర, శ్రీవారి సేవ ప్రాముఖ్యత, పురాణాల పరిజ్ఞానం తదితర అంశాలు ఉంటాయన్నారు. దీనికోసం ఆయా అంశాల్లో నిష్ణాతుల ద్వారా  శిక్షణ ఇచ్చేందుకు ఏర్పాట్లు చేశామని చెప్పారు.

ఈ శిక్షణ పొందిన  గ్రూప్ సూప‌ర్వైజ‌ర్లు త‌మ ప్రాంతాల్లో శ్రీ‌వారి సేవ‌కు న‌మోదు చేసుకున్న శ్రీ‌వారి సేవ‌కుల‌కు  సేవకు రాకమునుపే శిక్షణ అందించి వారిని భ‌క్తుల‌కు ఉన్న‌త‌మైన సేవ‌లు అందించే విధంగా తీర్చిదిద్ద‌డ‌మే ఈ కార్యక్రమం ముఖ్య ఉద్దేశ్యమని ఆయ‌న తెలిపారు.

ఈ శిక్షణ తరగతుల సారాన్ని గ్రహించి, ఇతర సేవకులను కూడా సమర్థవంతంగా తీర్చిదిద్దిద్దాలని గ్రూప్ సూపర్వైజర్లలకు సూచించారు.

ఈ కార్యక్రమంలో పండితులు డా. మేడసాని మోహన్, డా. దామోదర్ నాయుడు, డా. శ్రీనివాస్, టీటీడీ ఛీఫ్ వీఆర్వో డాక్టర్ టి.రవి, పీఆర్వో (FAC) కుమారి నీలిమ, సేవా సదన్ సిబ్బంది తదితరులు పాల్గొన్నారు.