అత్యంత వైభవంగా శ్రీ కపిలేశ్వర స్వామివారి బ్రహ్మోత్సవాలు sri kapileaswara swamy vari temple

తిరుప‌తిలోని శ్రీ కపిలేశ్వర స్వామివారి వార్షిక బ్రహ్మోత్సవాలు ఫిబ్రవరి 8 నుండి 17వ తేదీ వరకు అత్యంత వైభవంగా  నిర్వహించేందుకు విస్తృత ఏర్పాట్లు చేస్తున్నట్లు టీటీడీ జేఈవో శ్రీ వి. వీరబ్రహ్మం చెప్పారు. శ్రీ కపిలేశ్వర స్వామివారి ఆలయంలో మంగళవారం జేఈవో అధికారులతో బ్రహ్మోత్సవ ఏర్పాట్లపై సమీక్ష నిర్వహించారు. 

ఈ సందర్భంగా జేఈవో మాట్లాడుతూ, స్వామివారి బ్రహ్మోత్సవాలకు ముందు ఫిబ్రవరి 4న కోయిల్ ఆళ్వార్ తిరుమంజనం జరుగనుందని అందుకు తగ్గట్లు ఏర్పాట్లు చేయాలన్నారు. ఫిబ్రవరి 15న మహాశివరాత్రి సందర్భంగా అధిక సంఖ్యలో విచ్చేసే భక్తులకు అన్నప్రసాదాలు, బాదంపాలు నిరంతరాయంగా అందించాలన్నారు. భక్తులను ఆకట్టుకునేలా ఆధ్యాత్మిక భక్తి సంగీత కార్యక్రమాలు ఏర్పాటు చేయాలని సంబంధిత అధికారులను ఆదేశించారు. 

అదేవిధంగా ఆలయంలో పుష్కరిణిని పరిశుభ్రంగా ఉంచాలని, ఆకర్షణీయంగా పెయింటింగ్, రంగోళీలు, విద్యుత్, పుష్పాలంకరణలు ఏర్పాటు చేయాలన్నారు. స్వామివారి వాహనాల మరమ్మత్తులు, 

పటిష్టంగా క్యూలైన్లు, తిరుపతి నగరంలోని ప్రధాన కూడళ్లలో ఆర్చ్ లు ఏర్పాటు చేయాలని అధికారులకు సూచించారు.

బ్రహ్మోత్సవాలకు వచ్చే భక్తులకు ఎలాంటి అసౌకర్యం కలగకుండా చలువ పందిళ్లు, తాగునీరు, అన్నప్రసాదాలు అందించేందుకు వీలుగా సకాలంలో ఏర్పాట్లు పూర్తి చేయాలన్నారు. పారిశుధ్యానికి  పెద్దపీట వేస్తూ, అదనపు సిబ్బందిని ఏర్పాటు చేయాలని సంబంధిత అధికారులను ఆదేశించారు.

అనంతరం ఆలయంలో జరుగుతున్న అభివృద్ధి పనులను, క్యూలైన్లను పరిశీలించి అధికారులకు పలు సూచనలు చేశారు.

ఈ సమీక్షలో ఆలయ అర్చకులు, ఆలయ ప్రత్యేక అధికారి శ్రీ ఫణి కుమార్ నాయుడు, రవాణా విభాగం జిఎం శ్రీ శేషారెడ్డి, గార్డెన్ సూపరింటెండెంట్ శ్రీ శ్రీనివాసులు, ఈఈ శ్రీ మల్లికార్జున్, అన్న ప్రసాదం డిప్యూటీ ఈవో శ్రీ సెల్వం,  ఆలయ సూపరింటెండెంట్ శ్రీ చంద్రశేఖర్, ఇతర అధికారులు పాల్గొన్నారు.