అలంకార ప్రియుని సేవలో అనునిత్యం తరిస్తున్న సుగంధ పుష్ప మాలలు pushpalankaram

పుష్పాలంకార ప్రియుడైన తిరుమల శ్రీ వేంకటేశ్వర  స్వామివారికి నిర్వహించే అనేక సేవలలో పుష్పకైంకర్యం అత్యంత ప్రియమైనది. పవిత్రమైన  ”తిరువాయ్‌ మొళి” అనే ప్రాచీన తమిళ గ్రంథంలో కూడ పేర్కొన్నారు. స్వామివారి ఆపాదమస్తకం వివిధ రకాల సుగంధ భరిత కుసుమాలతో సర్వాంగ సుందరంగా అలంకరించే ఈ పుష్పహారాల వివరాలను ఇప్పుడు తెలుసుకుందాం. 

1. శిఖామణి :

కిరీటం మీదనుంచి రెండు భుజాలమీది వరకు అలంకరింపబడే ఒకే ఒక దండను ‘శిఖామణి’ అంటారు. ఇది ఎనిమిది మూరల దండ.

2. సాలిగ్రామ మాల :

శ్రీవారి భుజాల నుండి ఇరువైపులా పాదాల వరకు వేలాడుతూవున్న సాలగ్రామాల మాలలకు ఆనుకొని వేలాడదీస్తూ అలంకరింపబడే పొడవైన పూలమాలలు. ఇవి రెండుమాలలు. ఒక్కొక్కటి సుమారు 4 మూరలు.

3. కంఠసరి :

రెండు భజాలమీదికి అలంకరింపబడే దండ ఒకటి మూడున్నర మూరలు.

4. వక్షస్థల లక్ష్మి :

శ్రీవారి వక్షఃస్థలంలో ఉన్న శ్రీదేవి భూదేవులకు రెండుదండలు ఒక్కొక్కటి ఒకటిన్నర మూర. 

5. శంఖుచక్రం :

శంఖుచక్రాలకు రెండు దండలు. ఒక్కొక్కటి ఒక మూర. 

6. కఠారిసరం :

శ్రీస్వామివారి బొడ్డునవున్న నందక ఖడ్గానికి అలంకరించే దండ ఒకటి. రెండు మూరలు.

7. తావళములు :

రెండు మోచేతులకింద, నడుము నుండి మోకాళ్ళపై హారాలుగా, మోకాళ్ళ నుండి పాదాల వరకు జీరాడుతూ వ్రేలాడదీసే మూడు దండలు.

1. మూడు మూరలు 2. మూడున్నర మూరలు 3. నాలుగు మూరలు. 

8. తిరువడి దండలు :

శ్రీస్వామివారి పాదాలపై చుట్టూ అలంకరించే రెండు దండలు. ఒక్కొక్కటి ఒక్క మూర.

ప్రతి గురువారం జరిగే ”పూలంగి సేవ”లో మాత్రమే శ్రీస్వామివారి మూలమూర్తికి ఆభరణాలన్నీ తీసివేసి, పై పేర్కొన్న మాలలతో పాటు నిలువెల్ల స్వామివారిని విశేషంగా పూలమాలలతో అలంకరిస్తారు.