తిరుమలలో ఘనంగా శ్రీ పురందరదాసుల ఆరాధనా మహోత్సవాలు ప్రారంభం purandaradasa aradanotsavalu

కర్ణాటక సంగీత, పద కవితా  పితామహులు శ్రీ పురందరదాసులు సాక్షాత్తు నారద స్వరూపులని శ్రీ పాద రాజ మఠాధిపతి శ్రీ సుజయనిధి తీర్థ స్వామీజీ ఉద్ఘాటించారు.

శ్రీ పురందరదాసుల ఆరాధనా మహోత్సవాలు టీటీడీ దాస సాహిత్య ప్రాజెక్టు ఆధ్వర్యంలో శనివారం ఘనంగా ప్రారంభమయ్యాయి.

ఇందులో భాగంగా తిరుమలలోని ఆస్థాన మండపంలో సుప్రభాతం, ధ్యానం, సామూహిక భజన, నగరసంకీర్తన కార్యక్రమాలు, పురంద‌ర సాహిత్య‌ గోష్ఠి, వివిధ పీఠాధిపతుల మంగళాశాసనాలు, సంకీర్తనమాల కార్యక్రమాలు నిర్వహించారు. శ్రీ పాద రాజ మఠాధిపతి శ్రీ సుజయనిధి తీర్థ స్వామీజీ, శ్రీ వీద్యా విజయ తీర్థ స్వామీజీ మంగ‌ళ శాస‌న‌ములు అందించారు.

ఈ సందర్భంగా శ్రీ పాద రాజ మఠాధిపతి శ్రీ సుజయనిధి తీర్థ స్వామీజీ భక్తులకు అనుగ్రహ భాషణం చేస్తూ మాన‌వ జీవితం స‌మ‌స్య‌ల వ‌ల‌య‌మ‌ని, వీటి నుండి బ‌య‌ట‌ప‌డాలంటే న‌వ‌విధ భ‌క్తిమార్గాల్లో నామ‌సంకీర్త‌న‌కు విశేష ప్రాధాన్యం ఉంద‌ని తెలిపారు. భగవంతుని చేరాలంటే ముందు ఆయన పరమభక్తుల అనుగ్రహం అవసరమని పురాణాలు పేర్కొంటున్నాయని, ఈ కోవకు చెందిన పరమభక్తుడు శ్రీ పురందరదాసు అన్నారు. నేడు వేలాది మంది భక్తులు పురందరదాసు రచించిన లక్షలాది కీర్తనలు ఆలపిస్తూ స్వామివారి కృపకు పాత్రులు అవుతున్నారని, ఇదే కలియుగంలో నామసంకీర్తనకున్న వైశిష్ట్యమన్నారు.

అనంతరం టీటీడీ దాస సాహిత్య ప్రాజెక్టు ప్రత్యేక అధికారి శ్రీ ఆనందతీర్థాచార్యులు స్వామీజీలకు శ్రీవారి ప్రసాదాలు అందజేసి శాలువాతో సత్కరించారు.

ఈ కార్యక్రమంలో ఆంధ్ర ప్రదేశ్, కర్ణాటక, తమిళనాడుకు చెందిన భక్తులు వేలాది సంఖ్యలో పాల్గొన్నారు.

కాగా, రెండవ రోజైన జ‌న‌వరి 18న ఉదయం 6 గంటలకు అలిపిరి చెంత పురందరదాసుల విగ్రహానికి పుష్పమాల సమర్పిస్తారు. సాయంత్రం 6 గంటలకు శ్రీవారి ఆలయం నుండి నారాయణగిరి ఉద్యానవనం వరకు శ్రీవారి ఉత్సవమూర్తుల ఊరేగింపు, ఊంజల్‌సేవ, దాససంకీర్తన కార్యక్రమాలు ఉంటాయి.

చివరిరోజు జ‌న‌వరి 19న ఉదయం సుప్ర‌భాతం, ధ్యానం, సామూహిక భ‌జ‌న‌, న‌గ‌ర సంకీర్త‌న, ఉపన్యాసములు, సంగీత విభావరి కార్యక్రమాలు నిర్వహిస్తారు.