చంద్ర‌గిరి శ్రీ కోదండరామస్వామి ఆలయంలో ఘ‌నంగా కోయిల్‌ ఆళ్వార్‌ తిరుమంజనం - మార్చి 27న అంకురార్ప‌ణ‌ chandragiri temple

చంద్ర‌గిరి శ్రీ కోదండరామస్వామి ఆలయంలో మంగ‌ళ‌వారం కోయిల్‌ ఆళ్వార్‌ తిరుమంజనం ఘ‌నంగా నిర్వహించారు. ఆలయంలో మార్చి 28 నుండి ఏప్రిల్ 6 వ‌ర‌కు బ్ర‌హ్మోత్స‌వాలు జ‌రుగ‌నున్న నేప‌థ్యంలో కోయిల్‌ ఆళ్వార్‌ తిరుమంజనం నిర్వహించడం ఆనవాయితీ.

ఉదయం 9 నుండి 10 గంటల వరకు కోయిల్‌ ఆళ్వార్‌ తిరుమంజనం జరిగింది. ఇందులో భాగంగా గర్భాలయం, శ్రీ ఆంజనేయస్వామి, శ్రీగరుత్మంతుని సన్నిధి, ఆలయ ప్రాంగణం, గోడలు, పైకప్పు, పూజాసామగ్రి తదితర అన్ని వస్తువులను నీటితో శుద్ధి చేశారు. అనంతరం నామకోపు, శ్రీచూర్ణం, కస్తూరి పసుపు, పచ్చాకు, గడ్డ కర్పూరం, గంధం పొడి, కుంకుమ, కిచీలీగడ్డ తదితర సుగంధ ద్రవ్యాలు కలగలిపిన పవిత్రజలాన్ని ఆలయం అంతటా ప్రోక్షణం చేశారు. అనంతరం భక్తులను దర్శనానికి అనుమతించారు.

 ఈ కార్యక్రమంలో  టెంపుల్ ఇన్స్పెక్టర్ శ్రీ దినేష్‌కుమార్‌, ఆలయ అర్చకులు, ఇతర అధికారులు పాల్గొన్నారు.

మార్చి 27న అంకురార్ప‌ణ‌

శ్రీ కోదండరాముని బ్రహ్మోత్సవాలకు మార్చి 27వ తేదీ సాయంత్రం 6 నుండి రాత్రి 7.30 గంటల వ‌ర‌కు ఘనంగా అంకురార్పణ జరుగనుంది. ఈ సందర్భంగా సేనాధిపతి ఉత్సవం, విష్వక్సేనారాధాన, పుణ్యాహవచనం, వాస్తు పూజ‌, అంకురార్ప‌ణ‌ నిర్వహిస్తారు.

మార్చి 28న‌ ధ్వజారోహణం :

మార్చి 28వ తేదీ ఉద‌యం 8 నుండి 8.45 గంట‌ల మ‌ధ్య ధ్వజారోహణం నిర్వహిస్తారు. మార్చి 31న‌ ఉద‌యం 10 నుండి 11 గంట‌ల వ‌ర‌కు శ్రీ సీతా ల‌క్ష్మ‌ణ స‌మేత శ్రీ కోదండ‌రామ‌స్వామివారికి స్న‌ప‌న తిరుమంజ‌నం నిర్వ‌హిస్తారు. ఏప్రిల్ 1న సాయంత్రం 6 నుండి రాత్రి 8 గంట‌ల వ‌ర‌కు హ‌నుమంత వాహ‌నంపై స్వామివారు విహ‌రించి భ‌క్తుల‌కు ద‌ర్శ‌నం ఇవ్వ‌నున్నారు.

ఏప్రిల్ 3వ తేదీ ఉద‌యం 10 నుండి 11.30 గంట‌ల వ‌ర‌కు శ్రీ సీతారాముల కల్యాణోత్సవం, సాయంత్రం 6 నుండి రాత్రి 8 గంటల వరకు గరుడ వాహనంపై స్వామివారు ఉరేగుతూ భక్తులను కటాక్షించనున్నారు. రూ.750/- చెల్లించి గృహస్తులు(ఇద్దరు) కల్యాణోత్సవంలో పాల్గొనవచ్చు.

 ఏప్రిల్ 5వ తేదీ ఉదయం 9.30 నుండి 11.30 గంట‌ల వ‌ర‌కు స్వామి, అమ్మ‌వార్ల ఉత్స‌ర్ల‌కు, చక్రత్తాళ్వార్‌కు స్న‌ప‌న తిరుమంజ‌నం, చ‌క్ర‌స్నానం నిర్వ‌హించ‌నున్నారు. సాయంత్రం 6 గంటలకు ధ్వజావరోహణముతో బ్రహ్మోత్సవాలు ముగుస్తాయి.  

 ఏప్రిల్ 6వ తేదీ ఉద‌యం 9 నుండి 10.30 గంటల వరకు శ్రీ రామపట్టభిషేకం వైభవంగా నిర్వహించనున్నారు. బ్ర‌హ్మోత్స‌వాల సంద‌ర్భంగా ప్ర‌తి రోజు సాయంత్రం 6 నుండి రాత్రి 7 గంట‌ల వ‌ర‌కు ఊంజ‌ల సేవ జ‌రుగ‌నుంది.