భక్తుల నిరీక్షణ సమయాన్ని ఆధ్యాత్మిక అనుభూతిగా మార్చేలా ఎక్స్‌పీరియన్స్ సెంటర్ భక్తుల నిరీక్షణ సమయాన్ని ఆధ్యాత్మిక అనుభూతిగా మార్చేలా ఎక్స్‌పీరియన్స్ సెంటర్ ttd addl eo

తిరుమలలో భక్తుల నిరీక్షణ సమయాన్ని మరింత ఆధ్యాత్మికంగా, జ్ఞానదాయకంగా మార్చేందుకు టీటీడీ ఆధునిక సాంకేతిక పరిజ్ఞానాన్ని వినియోగిస్తూ హీలింగ్ అండ్ డివోషనల్ సెంటర్‌ (పిల్గ్రిమ్ ఎక్స్‌పీరియన్స్ సెంటర్)ను ఏర్పాటు చేసిందని టీటీడీ అదనపు ఈవో శ్రీ సి.హెచ్. వెంకయ్య చౌదరి తెలిపారు.

శుక్రవారం ఉదయం తిరుమలలోని వైకుంఠం క్యూ కాంప్లెక్స్-1లోని 17వ కంపార్ట్‌మెంట్‌లో ఏర్పాటు చేసిన హీలింగ్ అండ్ డివోషనల్ సెంటర్‌ను, నూతనంగా ఆధునీకరించిన శ్రీ వేంకటేశ్వర మ్యూజియంను మీడియా ప్రతినిధులు క్షేత్రస్థాయిలో పరిశీలించారు. అనంతరం పద్మావతి అతిథి గృహంలోని సుధర్మ సమావేశ మందిరంలో అదనపు ఈవో మీడియా ప్రతినిధులతో సమావేశమై ఈ రెండు ప్రాజెక్టులపై వారి అభిప్రాయాలను స్వయంగా తెలుసుకున్నారు.

ఈ సందర్భంగా అదనపు ఈవో మాట్లాడుతూ సెప్టెంబర్ 16న రాష్ట్ర ముఖ్యమంత్రి శ్రీ నారా చంద్రబాబు నాయుడు చేతుల మీదుగా తిరుమలలో పలు అభివృద్ధి ప్రాజెక్టులు ప్రారంభమయ్యాయని, వాటిలో భాగంగా వైకుంఠం క్యూ కాంప్లెక్స్‌లోని 17వ కంపార్ట్‌మెంట్‌లో పిల్గ్రిమ్ ఎక్స్‌పీరియన్స్ సెంటర్‌ను కూడా ప్రారంభించినట్లు తెలిపారు.

భక్తుల నిరీక్షణ సమయం జ్ఞానదాయకంగా

క్యూ లైన్లు, కంపార్ట్‌మెంట్లలో వేచి ఉండే భక్తులకు స్వామివారి వైభవం, తిరుమల చరిత్ర, పురాణాలు, ఆలయ విశిష్టత, ఆధ్యాత్మిక అంశాలు తదితరాలను 3డీ, వర్చువల్ రియాలిటీ వంటి ఆధునిక సాంకేతిక పరిజ్ఞానంతో అందించేందుకు ఈ కేంద్రాన్ని వినియోగించనున్నట్లు తెలిపారు.

భక్తులు దర్శనం కోసం వేచి ఉండే సమయం ఒక నిరీక్షణగా కాకుండా, ఆధ్యాత్మికతను పెంపొందించుకునే, జ్ఞానాన్ని పొందే సమయంగా మార్చాలన్నదే ఈ ప్రాజెక్టు ప్రధాన ఉద్దేశమని వివరించారు.

ఇప్పటికే దుర్లభ్ దర్శనం సంస్థ ఆధ్వర్యంలో వర్చువల్ రియాలిటీకి సంబంధించిన కంటెంట్‌ను రూపొందించారని, భారీ స్థాయిలో భక్తులను ఆకట్టుకునేలా ఈ సాంకేతికతను ఎలా వినియోగించాలన్న అంశంపై మరింతగా కృషి జరుగుతోందని చెప్పారు.

భవిష్యత్తులో స్వామివారికి సంబంధించిన కథలు, భక్తుల అనుభవాలు, తిరుమల కొండపై ఉన్న వివిధ విశిష్టతలు, ఆలయ చరిత్ర, నిర్మాణం, పరిపాలన, సేవలు, పురాణాలు, దాతలు తదితర అంశాలపై నాణ్యమైన కంటెంట్‌ను రూపొందించి ఎప్పటికప్పుడు ప్రసారం చేయనున్నట్లు తెలిపారు.

కంటెంట్ కోసం ప్రత్యేక వ్యవస్థ

ఎక్స్‌పీరియన్స్ సెంటర్‌లో నిరంతరం కొత్త కంటెంట్ అందుబాటులో ఉండేలా ఒక ప్రత్యేక వ్యవస్థను రూపొందించాల్సిన అవసరం ఉందని అదనపు ఈవో తెలిపారు. పురాణాలు, కలియుగ ప్రత్యక్ష దైవమైన శ్రీ వేంకటేశ్వరస్వామివారి వైభవం, స్వామివారి సేవలు, భక్తుల కథలు, ఆలయ నిర్మాణం, చరిత్ర, పరిపాలన, దాతల సేవలు తదితర అంశాలపై విభిన్న కథనాలను రూపొందించి క్రమం తప్పకుండా ప్రసారం చేసే విధంగా చర్యలు తీసుకుంటామని చెప్పారు.

దీంతో భక్తులు దర్శనానికి వెళ్లే ముందు స్వామివారి గురించి, తిరుమల ఆలయం గురించి, ఇక్కడి సంప్రదాయాలు, సేవలు, చరిత్ర గురించి మరింత తెలుసుకుని ఆధ్యాత్మిక పరిపూర్ణత, సంతృప్తితో దర్శనం చేసుకునే అవకాశం కలుగుతుందని తెలిపారు.

14 గ్యాలరీలతో ఎస్వీ మ్యూజియం

ముఖ్యమంత్రి చేతుల మీదుగా ప్రారంభమైన మరో ముఖ్యమైన ప్రాజెక్టు నూతనంగా ఆధునీకరించిన శ్రీ వేంకటేశ్వర మ్యూజియం అని అదనపు ఈవో తెలిపారు.

డిజిటల్ కంటెంట్‌తో పాటు తిరుమల ఆలయ చరిత్ర, వారసత్వం, పురాతన కళాఖండాలు, చారిత్రక వస్తువులను సమగ్రంగా ప్రదర్శించే విధంగా మ్యూజియంను ఆధునీకరించినట్లు చెప్పారు. దాదాపు 14 గ్యాలరీల్లో ప్రత్యేకమైన థీమ్‌తో మ్యూజియాన్ని తీర్చిదిద్దామని, ఆలయ సంప్రదాయం, వారసత్వానికి అనుగుణంగా ప్రత్యేకంగా రూపొందించామని తెలిపారు.

మ్యూజియం నిర్వహణకు సంబంధించి ఇప్పటికే ప్రత్యేక మాన్యువల్‌ను రూపొందిస్తున్నామని, ఇందులో సీసీ కెమెరాల ఏర్పాటు, సిబ్బంది నియామకం, గైడ్ల సేవలు, భద్రతా చర్యలు, కళాఖండాల ప్రత్యేక నంబరింగ్ తదితర అంశాలను పొందుపరుస్తున్నట్లు తెలిపారు.

మ్యూజియంను ఎస్ఓపీ ప్రకారం నిర్వహించేలా చర్యలు తీసుకుంటున్నామని, త్వరలో భక్తులకు అందుబాటులోకి తీసుకురానున్నట్లు వెల్లడించారు.

తిరుమల ఆధ్యాత్మిక అనుభూతికి కొత్త కోణం

తిరుమలలో భక్తులకు దర్శనంతో పాటు ఇతర ఆధ్యాత్మిక, జ్ఞానదాయక అనుభూతులను అందించడమే టీటీడీ లక్ష్యమని అదనపు ఈవో తెలిపారు.

భక్తులు తమ నిరీక్షణ సమయంలో ఎక్స్‌పీరియన్స్ సెంటర్, మ్యూజియం వంటి ప్రదేశాలను సందర్శించి తిరుమల చరిత్ర, ఆలయ విశిష్టత, స్వామివారి సేవలు, సంప్రదాయాలు తదితర అంశాలను తెలుసుకునే అవకాశం కల్పిస్తే వారి తిరుమల యాత్ర మరింత పరిపూర్ణంగా మారుతుందని చెప్పారు.

తిరుమలను మరింత ప్రత్యేకమైన ఆధ్యాత్మిక కేంద్రంగా తీర్చిదిద్దడంలో ఇటువంటి ప్రాజెక్టులు కీలకపాత్ర పోషిస్తాయని తెలిపారు.

మీడియా సూచనలను పరిగణనలోకి తీసుకుంటాం

హీలింగ్ అండ్ డివోషనల్ సెంటర్, ఎస్వీ మ్యూజియంలను పరిశీలించిన మీడియా ప్రతినిధుల నుంచి పలు విలువైన సూచనలు అందాయని అదనపు ఈవో తెలిపారు.

ముఖ్యంగా తెలుగు కంటెంట్‌ను మరింతగా పెంచడం, కంటెంట్‌ను క్రమం తప్పకుండా మార్చడం, విభిన్న అంశాలను అందించడం తదితర సూచనలను పరిగణనలోకి తీసుకుంటామని చెప్పారు. మీడియా ప్రతినిధులు ఇచ్చిన సంబంధిత సూచనలను అంతర్గతంగా చర్చించి, ఎక్స్‌పీరియన్స్ సెంటర్‌లో కంటెంట్ మరియు నిర్వహణ వ్యవస్థను మరింత మెరుగుపరిచేందుకు అవసరమైన చర్యలు తీసుకుంటామని తెలిపారు.

ఈ సమావేశంలో డిప్యూటీ ఈవో శ్రీ సోమన్నారాయణ, సీపీఆర్వో డాక్టర్ టి.రవి, విజీవో శ్రీ సురేంద్ర, ఇతర అధికారులు పాల్గొన్నారు.