గజ వాహనసేవలో అద్భుత కళా వైభవం culatural events

తిరుమల శ్రీవారి నవరాత్రి బ్రహ్మోత్సవాల్లో భాగంగా శనివారం సాయంత్రం నిర్వహించిన గజ వాహనసేవలో దేశవిదేశాల కళాకారులు తమ సంప్రదాయ నృత్యాలు, జానపద కళారూపాలతో భక్తులను పరవశింపజేశారు. శ్రీ మలయప్పస్వామివారి వైభవానికి కళా నీరాజనాలు అర్పిస్తూ తిరుమల మాడవీధులను భక్తిరసంతో, సాంస్కృతిక వైభవంతో పులకింపజేశారు.

విదేశాల్లోనూ వెల్లివిరిసిన భారతీయ కళా వైభవం

ఖతర్ కళాకారులు భరతనాట్యం, దుబాయ్ కళాకారులు కూచిపూడి ప్రదర్శనలతో భారతీయ శాస్త్రీయ నృత్య సంప్రదాయాలను చాటగా, పుదుచ్చేరి కళాకారులు కరగట్టం నృత్యంతో ఆకట్టుకున్నారు.

వైవిధ్యభరిత జానపద కళారూపాలు

ఆంధ్రప్రదేశ్ కళాకారుల లంబాడీ నృత్యం, మహారాష్ట్ర కళాకారుల లెజిమ్స్, కర్ణాటక కళాకారుల గజేంద్ర మోక్షం నృత్యరూపకం, మధ్యప్రదేశ్ కళాకారుల కథక్, పంజాబ్ కళాకారుల భాంగ్రా ప్రదర్శనలు భక్తులను విశేషంగా అలరించాయి.

16 కళాబృందాల్లో 451 మంది కళాకారులు

ఈ సేవలో టీటీడీకి చెందిన నాలుగు ప్రాజెక్టుల నుంచి మొత్తం 16 కళాబృందాల్లో 451 మంది కళాకారులు పాల్గొన్నారు. హిందూ ధార్మిక ప్రాజెక్టు నుంచి 161 మంది, శ్రీ వేంకటేశ్వర సంగీత నృత్య కళాశాల నుంచి 93 మంది, దాససాహిత్య ప్రాజెక్టు నుంచి 114 మంది, అన్నమాచార్య ప్రాజెక్టు నుంచి 81 మంది కళాకారులు తమ ప్రతిభను ప్రదర్శించారు.

భక్తి, సంప్రదాయం, జానపద కళల సమ్మేళనంగా గజ వాహనసేవ భారతీయ సంస్కృతీ వైభవాన్ని చాటుతూ భక్తులకు కనువిందు చేసింది.