శ్రీవారి నవరాత్రి బ్రహ్మోత్సవాల నేపథ్యంలో తిరుమల గోశాలలో ఏర్పాట్ల పరిశీలన goshala

శ్రీవారి నవరాత్రి బ్రహ్మోత్సవాలు ఈ నెల 12వ తేదీ నుంచి 20వ తేదీ వరకు జరగనున్న నేపథ్యంలో, ఉత్సవాల నిర్వహణకు సంబంధించి టీటీడీ చేపడుతున్న ఏర్పాట్లలో భాగంగా టీటీడీ అదనపు ఈవో శ్రీ సి.హెచ్. వెంకయ్య చౌదరి తిరుమలలోని గోశాలను శుక్రవారం సాయంత్రం సందర్శించి ఏర్పాట్లను పరిశీలించారు.

ఈ సందర్భంగా గోశాలలోని గోవుల సంరక్షణ, పశువుల ఆరోగ్య పరిస్థితులు, పాల ఉత్పత్తి సామర్థ్యం, పశుగ్రాసం నిల్వలు, ఇతర అవసరాలపై అధికారులతో సమీక్షించారు.

బ్రహ్మోత్సవాల సమయంలో ఎలాంటి ఇబ్బందులు తలెత్తకుండా అన్ని విభాగాలు సమన్వయంతో పనిచేయాలని సూచించారు.

ఈ సందర్భంగా ఆయన మాట్లాడుతూ తిరుమల గోశాలలో ప్రస్తుతం సుమారు 100 గోవులు ఉన్నాయని, రోజుకు దాదాపు 90 లీటర్ల పాలు ఉత్పత్తి అవుతున్నాయని తెలిపారు. శ్రీవారి కైంకర్యాలకు గోశాల నుంచి సేకరించిన పాలను వినియోగిస్తున్నట్లు పేర్కొన్నారు.

అదేవిధంగా, ప్రతిరోజూ నిర్వహించే నవనీత సేవకు అవసరమైన సుమారు 1.5 కిలోల వెన్నను కూడా గోశాల నుంచే సమకూర్చుతున్నట్లు వివరించారు. నవనీత సేవకు సంబంధించిన ఊరేగింపు కూడా గోశాల నుంచే ప్రారంభమవుతుందని తెలిపారు.

బ్రహ్మోత్సవాల్లో పాల్గొనే ఏనుగులు, గుర్రాలు, ఎద్దుల సంరక్షణ, వాటి ఆరోగ్య పరిస్థితులు, ఉత్సవాల్లో పాల్గొనేందుకు అవసరమైన శిక్షణ, సన్నద్ధతను కూడా పరిశీలించారు.

జంతువుల సంరక్షణలో సిబ్బందికి ఉన్న అనుభవాన్ని, వాటి ఆరోగ్య పరిరక్షణకు తీసుకుంటున్న చర్యలను సమీక్షించారు. జంతువులకు అవసరమైన వైద్య సదుపాయాలు, వెటర్నరీ నిపుణుల సేవలు, అత్యవసర పరిస్థితులను ఎదుర్కొనేందుకు అవసరమైన ఏర్పాట్లు అందుబాటులో ఉంచాలని సంబంధిత అధికారులకు సూచించారు. గోవులకు అవసరమైన పశుగ్రాసం, ఇతర వసతులను పటిష్ఠంగా సమకూర్చుకోవాలని ఆదేశించారు.

తిరుమల గోశాలలో ప్రతి శుక్రవారం గోమాతకు ప్రత్యేక పూజలు నిర్వహిస్తున్నట్లు ఈ సందర్భంగా వివరించారు.