టీటీడీ సాధికారిక మండలి సభ్యులుగా శ్రీ వి.వినయ్ చంద్ ప్రమాణస్వీకారం member of ttd

టీటీడీ సాధికారిక మండలి సభ్యులుగా ఆంధ్రప్రదేశ్ ఆర్థికశాఖ సెక్రటరీ శ్రీ వి.వినయ్ చంద్ బుధవారం ప్రమాణస్వీకారం చేశారు. తిరుమల శ్రీవారి ఆలయంలోని బంగారు వాకిలి వద్ద జరిగిన కార్యక్రమంలో టీటీడీ అదనపు ఈవో శ్రీ సి.హెచ్. వెంకయ్య చౌదరి ఆయనతో ప్రమాణం చేయించారు. అనంతరం రంగనాయకుల మండపంలో వేదపండితులు వేదాశీర్వచనం అందించి శ్రీవారి తీర్థప్రసాదాలను అందజేశారు.

ఈ సందర్భంగా ఆలయం ముందు మీడియాతో శ్రీ వి.వినయ్ చంద్  మాట్లాడుతూ, కలియుగ ప్రత్యక్ష దైవమైన శ్రీవేంకటేశ్వర స్వామివారి సన్నిధిలో టీటీడీ సాధికారిక మండలి సభ్యులుగా ప్రమాణస్వీకారం చేయడం తన పూర్వజన్మ సుకృతం అన్నారు.

తనపై నమ్మకం ఉంచి ఈ అవకాశం కల్పించిన ముఖ్యమంత్రివర్యులు శ్రీ నారా చంద్రబాబు నాయుడు గారికి కృతజ్ఞతలు తెలిపారు. టీటీడీ సాధికారిక మండలి సభ్యుడిగా ఉన్నంత వరకు సాధికారిక మండలి చైర్మన్ శ్రీ ముద్దాడ రవిచంద్ర, మరో సభ్యులు శ్రీ కె.కన్నబాబులతో సమన్వయంతో పని చేసి భక్తులకు అన్ని రకాల సౌకర్యాలు కల్పించేందుకు శాయశక్తులా కృషి చేస్తానని తెలియజేశారు.

ఈ కార్యక్రమంలో సీవీఎస్వో శ్రీ మురళీకృష్ణ, శ్రీవారి ఆలయ డిప్యూటీ ఈవో శ్రీ భాస్కర్, బోర్డు సెల్ డిప్యూటీ ఈవో శ్రీమతి ప్రశాంతి, ఇతర అధికారులు పాల్గొన్నారు.